ریاض (ممتاز احمد بڈانی) سعودی مسلح افواج کے چیف آف دی جنرل سٹاف  جنرل فیاض بن حمید الرویلی سے پاکستانی جوائنٹ چیف آف سٹاف کے چیئرمین جنرل ندیم رضا نے اپنے وفد کے ہمراہ ملاقات کی۔ سعودی مسلح افواج کے سربراہ نے پاکستانی مسلح افواج کے وفد کا استقبال کیا اور انہیں مملکت میں خوش آمدید کہا۔ پاکستانی افواج کے وفد کے سربراہ جنرل ندیم رضا نے سعودی افواج کے سربراہ کی جانب سے شاندار استقبال کیے جانے پر خصوصی شکریہ ادا کیا۔ استقبالیہ تقریب کے بعد سعودی، پاکستان ملٹری کمیٹی کا چھٹا اجلاس ہوا جس میں دونوں برادر ممالک کے درمیان مستحکم تعلقات کے حوالے سے تبادلہ خیال کرتے ہوئے باہمی عسکری تعاون کے امکانات اور ان میں  فروغ کے طریقوں کا بھی جائزہ لیا گیا۔ مختلف باہمی دلچسپی کے امور پر تبادلہ خیال بھی کیا گیا۔