لاہور (سپورٹس رپورٹر)پاکستان کرکٹ ٹیم کے اوپننگ بیٹر فخر زمان نے کہا ہے کہ بابر اعظم کے بارے میں یہ کہہ سکتے ہیں کہ دس میں سے پانچ میچوں میں بڑا سکور کریگا۔ ہم سب کی کوشش ہے کہ رضوان اور بابر کی طرح کھیلیں جنہوں نے سٹینڈرڈ ہائی کردیا ہے، بائولنگ میں بھی تمام کھلاڑی شاندار کارکردگی دکھا رہے ہیں۔ کرکٹ ایسی گیم ہے جس میں آپ پیشگوئی نہیں کرسکتے، ہم لوگ ورلڈ کپ کو زیادہ دماغ پر لے لیتے ہیں، جب ورلڈ کپ آئیگا ہم پہلے کی طرح تیاری کریں گے، کھلاڑیوں کا سارا فوکس اگلے میچ پر ہوتا ہے۔ اپنی خامیاں دور کرنے کیلئے کام کریں تو کامیابیاں ملتی ہیں، میری کوشش ہوتی ہے اپنی کرکٹ پر زیادہ فوکس کروں۔ انٹرنیشنل کرکٹ میں آ کر پاور ہٹنگ اور فٹنس بہتر ہوئی، 2016 میں میری جو تکنیک تھی اب وہ نہیں ہے، کافی عرصے سے سکور نہیں ہوا تھا جس پر بہت محنت کی، پاکستان کیلئے جب بھی رنز کرتا ہوں تو اچھا لگتا ہے۔ آسٹریلیا کے فاسٹ بائولر مچل سٹارک اور نیوزی لینڈ کے فاسٹ بائولر ٹرینٹ بولٹ کو بھی کھیلا ہوں لیکن شاہین آفریدی کو کھیلنا مشکل ہے۔