لاہور ( سپورٹس رپورٹر) بھارت میں شیڈول ون ڈے ورلڈکپ 2023ء کیلئے پاکستان کے ممکنہ سکواڈ میں کن کھلاڑیوں کو موقع ملنے کا امکان ہے۔پاکستان کرکٹ بورڈ نے قومی ٹیم کے سکواڈ کا اعلان نہیں کیا ہے تاہم ممکنہ طور پر گرین شرٹس کیلئے نیوزی لینڈ کیخلاف سیریز میں دولگاتار دو سنچریاں بنانے والے فخر زمان‘امام الحق جبکہ تیسرے اوپنر کے طور پر شان مسعود کو سکواڈ میں شامل کیے جانے کا امکان ہے۔ون ڈے رینکنگ میں ٹاپ بیٹر اور کپتان بابراعظم، مڈل آرڈر میں حارث سہیل، افتخار احمد، آغا سلمان اور محمد رضوان شامل ہوسکتے ہیں۔سپن بائولنگ کے شعبے میں نائب کپتان شاداب خان کی جگہ پکی دکھائی دے رہی ہے تاہم انکے ہمراہ اسامہ میر کو شامل کئے جانے کا قوی امکان ہے، سپن آل رائونڈرز کیلئے طویل عرصے بعد ٹی ٹونٹی ٹیم میں جگہ پانے والے عماد وسیم یا کیویز کیخلاف انجری کا شکار ہونے والے محمد نواز سکواڈ کا حصہ بن سکتے ہیں۔ فاسٹ بائولنگ کے شعبے میں شاہین شاہ آفریدی کیساتھ نسیم شاہ، حارث رئوف، محمدوسیم جونیئر اور احسان اللہ خان کو شامل کئے جانے کی اطلاعات سامنے آرہی ہیں۔ قومی ٹیم کی سلیکشن کمیٹی میں ہارون الرشید کے علاوہ سابق کرکٹر محمد سمیع اور یاسر حمید شامل ہیں۔ماضی میں آئی سی سی قوانین کے تحت کرکٹ بورڈ کو پہلے 30ممکنہ سکواڈ کا اعلان کرنا ہوتا تھا تاہم رواں سال ورلڈکپ میں 15سے 16رکنی سکواڈ کے اعلان کی توقع ہے۔