شیر افضل مروت نے پارٹی کیلئے زبردست کام کیا، کئی بار سمجھایا پالیسی کے خلاف کام نہ کرو: عمران 

اسلام آباد (نمائندہ نوائے وقت) بانی چیئرمین پی ٹی آئی نے اڈیالہ جیل میں شیر افضل مروت سے متعلق میڈیا سے گفتگو کرتے ہوئے کہا کہ شیر افضل مروت نے پارٹی کے لئے زبردست کام کیا۔ سیاسی جماعت میں دائرے کے اندر رہ کر کام کرنا ہوتا ہے۔ شیر افضل مروت کو کئی مرتبہ سمجھایا پارٹی پالیسی کی خلاف ورزی نہ کرے، شیر افضل مروت ہر دوسرے دن کسی نہ کسی پارٹی لیڈر پر چڑھائی کر دیتا تھا۔ شیر افضل کو سمجھایا کہ جنگ باہر والوں سے ہوتی ہے پارٹی میں لڑائی نہیں ہوتی۔ سعودی وفد کے دورہ کے موقع پر شیر افضل مروت نے متنازعہ بیان دیا۔ محمد بن سلمان نے میرے کہنے پر دو مرتبہ او آئی سی کانفرنس کرائی۔ شیر افضل مروت اب بھی پارٹی پالیسی کے مطابق چلے تو کوئی ایشو نہیں ہے۔ شیر افضل مروت کو نوٹس جاری کیا ہے جواب دیں گے تو ٹھیک ہے۔ کوئی پارٹی ڈسپلن میں رہے تو ٹھیک خلاف ورزی کرے تو پورس کا ہاتھی بن جاتا ہے۔ صحافی نے سوال کیا کہ شیر افضل مروت نے کہا ہے بانی پی ٹی آئی ملاقات کے لئے بلائیں گے تو جیل جاؤں گا کیا آپ ان کو بلائیں گے، بانی پی ٹی آئی صحافی کے سوال کا جواب دئیے بغیر چلے گئے۔