سلام بحضور امام عالی مقامؓ .... تنویر ظہور

اللہ کا حکم سہارے کو
احمد کی آنکھ کے تارے کو
حیدرؓ کے راج دلارے کو
زہراؓ کے دل کے سہارے کو
اس عزم وفا کے پارے کو
دل پیش کروں جاں پیش کروں
جو ظل و ستم سے ٹکرایا
جس نے اک اک لعل گنوایا
جس نے رب کا دین بچایا
جو نیزے پر نہ گھبرایا
اس عظمت کے مینارے کو
دل پیش کروں جاں پیش کروں
جس نے رضا پہ کنبہ وارا
خون کا اک اک رشتہ وارا
ہنس کر نور نظر کا وارا
اصغرؓ جیسا ہیرا وارا
اس شہر وفا کے پیارے کو
دل پیش کروں جاں پیش کروں
جس کا ہے یہ سارا زمانا
جس کا ہے ہر ایک خزانا
جس کا ہے لج پال گھرانا
پاک نبی ہے جس کا نانا
اس حوروں کے من ٹھارے کو
دل پیش کروں جاں پیش کروں
جس نے بھوک اور پیاس نبھائی
جس نے صبر کی شان بڑھائی
جس نے حق کی شمع جلائی
جس نے سیدھی راہ دکھائی
اس بہتے نور کے دھارے کو
دل پیش کروں جاں پیش کروں