لاہور (سپورٹس رپورٹر ) چوتھی پاک چیس انٹرنیشنل رینکنگ شطرنج چیمپئن شپ زوہیب احمد نے جیت لی۔ تین روزہ چیمپئن شپ میں ملک بھر سے ٹاپ شطرنج کھیلنے والے افراد نے حصہ لیا۔ زوہیب احمد نے پاکستان نمبر دو ڈاکٹر مرتضیٰ کو شکست دیکر چیمپئن شپ جیتنے کا اعزاز حاصل کیا۔ آرگنائزر وقار مدنی کے مطابق ایونٹ کے تمام رزلٹ انٹرنیشنل چیس فیڈریشن کو بھیجے جائیں گے، جو30 نومبر کو نئی جاری ہونے والی رینکنگ میں پاکستانی کھلاڑیوں کو بھی شامل کرے گی اور نئی عالمی ریکنگ جاری کی جائیگی۔ پندرہ سال سے قومی چیمپئن محمود لودھی نے بھی ایونٹ میں حصہ لیا۔ محمود لودھی نہ صرف پاکستان نمبر ون ہیں بلکہ حال ہی میں ایشین چیس چیمپئن شپ میں سلور میڈل حاصل کرنے میں کامیاب ہوئے ہیں۔