لاہور+صفدر آباد (این این آئی + نامہ نگار) صفدر آباد سٹیشن کے قریب کراچی سے لاہور جانے والی قراقرم ایکسپریس کی 2 بوگیاں پٹڑی سے اتر گئیں جن کے نتیجے میں بچوں اور خواتین سمیت متعدد مسافر زخمی ہو گئے۔ تفصیلات کے مطابق کراچی سے لاہور جانے والی قراقرم ایکسپریس کی 2 بوگیاں پٹڑی سے اتر گئیں۔ حادثے میں متعدد مسافر زخمی ہو گئے‘ تاہم کوئی جانی نقصان نہیں ہوا۔ زخمیوں کو ہسپتال منتقل کر دیا گیا ہے۔ حادثے کے باعث لاہور فیصل آباد سیکشن مکمل طورپر بند ہو گیا اور ٹرینیں گھنٹوں تاخیر کا شکار ہو گئیں جس سے مسافروں کو شدید پریشانی کا سامنا کرنا پڑا۔ قراقرم ایکسپریس کو دوسرا انجن لگا کر منزل مقصود کی طرف روانہ کر دیا گیا ہے۔