کلرکہار‘ آبشار میں نہاتے لاہور کے 3 نوجوان ڈوب کر جاں بحق‘ 3 زخمی

کلرکہار (نوائے وقت رپورٹ) کلرکہار کے  سیاحتی مرکز نیلہ واہن میں لاہور سے آئے تین نوجوان ڈوب کر جاں بحق ہوگئے۔ مقامی افراد کے مطابق 6 افراد آبشار میں نہاتے ہوئے چٹانوں سے ٹکرا گئے، جس کے نتیجے میں 3 افراد جاں بحق اور 3 شدید زخمی ہوگئے۔ ذرائع کے مطابق نوجوان لاہور سے تفریح کی غرض سے کلر کہار کے خوبصورت سیاحتی مقام نیلا واہن آئے تھے، تاہم بدقسمتی سے آبشار کے تیز رفتار پانی کی زد میں آکر پھسل گئے اور چٹانوں سے ٹکرانے کے باعث موت کی وادی میں چلے گئے، ریسکیو رضاکاروں نے نعشوں اور زخمیوں کو ہسپتال منتقل کر دیا۔ جاں بحق افراد کی شناخت عثمان، بلال اور ذوالفقار کے نام سے ہوئی۔ واضح رہے کہ نیلا واہن کلرکہار سے 25 کلومیٹر آگے خوشاب روڈ پر وادی کے بیچوں بیچ واقع ہے  یہ چشمہ آب شفا ہونے کی وجہ بہت مشہور ہے۔
3 نوجوان جاں بحق