اسلام آباد (خبر نگار خصوصی + نوائے وقت رپورٹ) صدر مملکت عارف علوی، وزیراعظم شہباز شریف اور دیگر سیاست دانوں نے پاکستان کی جانب سے کم سکور کرنے کے باوجود بھرپور مقابلہ کرنے پر قومی ٹیم کی کارکردگی کو سراہا۔ صدر مملکت ڈاکٹر عارف علوی نے فائنل میچ کے فوری بعد ٹویٹ کرتے ہوئے کہا کہ عمدہ آل راؤنڈر کارکردگی کا مظاہرہ کرتے ہوئے ورلڈ کپ جیتنے پر انگلینڈ کو مبارک، پاکستان ٹیم آپ نے اچھا کھیلا، کم سکور کے باوجود اچھی باؤلنگ کی اور اپنی پوری کوشش کی۔ وزیر اعظم شبہاز شریف نے سماجی رابطے کی ویب سائٹ پر بیان جاری کرتے ہوئے کہا کہ پاکستانی ٹیم نے بہادری سے مقابلہ کیا اور بہترین باؤلنگ کا مظاہرہ کیا۔ انہوں نے کہا کہ آج انگلینڈ کی ٹیم زیادہ اچھا کھیلی، اس میگا ٹورنامنٹ کے فائنل میں پہنچنے پر ہمیں پاکستانی کھلاڑیوں پر فخر ہے۔ پاکستان مسلم لیگ (ن) کی جانب سے ٹویٹ کی گئی کہ آپ چیمپئنز کی طرح کھیلے، ہمارے لیے آپ ہمیشہ چیمپئن ہیں۔ پاکستان تحریک انصاف (پی ٹی آئی) نے کہا کہ پاکستان کی بہترین ٹیم پر فخر ہے۔ آج ٹیم پاکستان نے شان دار مقابلہ کیا۔ امیر جماعت اسلامی سراج الحق نے قومی ٹیم کی کارکردگی کو سراہتے ہوئے کہا کہ ورلڈ کپ کے دوران یک جان ہو کر شاندار کوشش کی اور زبردست کھیل پیش کیا۔ دنیائے کرکٹ اس کا اعتراف کرتی نظر آرہی ہے۔ قوم کو آپ پر فخر ہے۔ امیر جماعت اسلامی کراچی حافظ نعیم الرحمٰن نے شاداب خان اور نسیم شاہ کی باؤلنگ کی تعریف کی اور انتظامیہ پر تنقید کرتے ہوئے کہا کہ انہیں اب میرٹ کا سوچنا چاہیے۔ پی ٹی آئی کے رہنما اسد عمر کا کہنا تھا کہ پاکستانی ٹیم ٹورنامنٹ میں بہت اچھا کھیلی، دنیا کی سب سے بہترین محدود اوورز کی ٹیم انگلینڈ نے ورلڈ کپ میں کامیابی حاصل کی۔ پی ٹی آئی کے سینیٹر فیصل جاوید خان نے سماجی رابطے کی ویب سائٹ پر ٹویٹ میں کہا کہ اس میں کوئی شک نہیں کہ پاکستان کے پاس دنیا کا بہترین باؤلنگ اٹیک ہے۔ لڑکو کم از کم آپ نے بہترین مقابلہ کیا۔ اتوار کو اپنے ٹویٹ میں وزیراعظم نے کہا کہ انگلینڈ کرکٹ ٹیم نے فائنل میں بہتر کھیل پیش کیا۔ تاہم ٹیم پاکستان نے بھی بھرپور اور دلیرانہ مقابلہ کیا۔ خصوصا بائولنگ کے شعبہ میں شاندار کارکردگی کا مظاہرہ کیا۔ اس میگا ایونٹ کے فائنل میں جگہ بنانے پر ہمیں اپنی قومی ٹیم کے کھلاڑیوں پر فخر ہے۔ وزیراعظم محمد شہباز شریف نے کہا ہے کہ پاکستان کرکٹ ٹیم نے ورلڈ کپ فائنل تک پہنچنے کے لیے تمام مشکلات کو شکست دی ہے۔ وزیراعظم نے کہا کہ میں جانتا ہوں کہ آپ میں جیتنے کا جذبہ، حوصلہ اور عزم ہے۔ وزیر اعظم نے قومی کرکٹ ٹیم کی حوصلہ افزائی کرتے ہوئے کہا کہ اپنے آپ پر یقین رکھیں اور اپنا بہترین کھیل کھیلیں۔ پوری قوم آپ کے پیچھے کھڑی ہے۔