گوجرانوالہ (نمائندہ خصوصی) سکریپ ڈھلائی کے دوران بھٹی میں زوردار دھماکہ سے تین مزدور جاں بحق جبکہ چار بری طرح جھلس گئے۔ ریسکیو اہلکاروں نے زخمیوں کو تشویشناک حالت میں ہسپتال منتقل کر دیا۔ بتایا گیا ہے کہ نگار چوک کے قریب واقع فیکٹری میں مزدور حسب معمول کام میں مصروف تھے کہ اس دوران انہوں نے سکریپ ڈھلائی کیلئے بھٹی میں ڈالا تو اچانک زوردار دھماکہ ہو گیا۔ 7 مزدور اسحاق، خان محمد، معظم، عمران، نوید، منشاء اور عرفان بری طرح جھلس گئے۔ تاہم واقعہ کی اطلاع پا کر ریسکیو اہلکار بھی موقع پر پہنچ گئے جنہوں نے زخمیوں کو فوری ڈسٹرکٹ ہسپتال منتقل کیا۔ اسحاق‘ خان محمد اور عمران کو لاہور ریفر کیا گیا جہاں پر وہ کچھ دیر موت وحیات کی کشمکش میں مبتلا رہنے کے بعد جان کی بازی ہار گئے۔ معظم کی حالت بھی نازک بیان کی جاتی ہے جبکہ دیگر مزدوروں کو طبی امداد فراہم کی جا رہی ہے۔ دھماکہ کی وجہ معلوم نہیں ہو سکی۔