لاہور(نامہ نگار)راجن پور پولیس نے کچہ کے ڈاکوؤں کے سہولت کاروں کے خلاف کامیاب کارروائی کرکے بھاری تعداد میں اسلحہ قبضے میں لے لیا ۔ تھانہ شاہ والی پولیس کی کچہ کریمنلز کے سہولت کار غلام اصغر عرف ادو شاہ اور آغا شاہ کے ٹھکانے پر کامیاب ریڈ کیا ‘ ملزم لٹھانی گینگ، سکھانی گینگ اور دادو بنگیانی گینگ کیلئے سہولت کاری کا کام کرتے تھے۔ ملزم ڈاکوؤں کو پولیس کی نقل و حرکت بارے آگاہی اور اغواء برائے تاوان، ڈکیتی کی وارداتوں میں مدد کرتے تھے۔ پولیس نے ملزمان کی نقل و حرکت اور روابط کو جدید ٹیکنالوجی کی مدد سے ٹریس آؤٹ کیا، پولیس ریڈنگ پارٹی پر ملزم کے ساتھیوں کی جانب سے بھاری اسلحہ سے حملہ، پولیس وین کو نقصان پہنچا۔پولیس کی بھرپور جوابی کاروائی، ملزمان رات کی تاریکی کا فائدہ اٹھاتے ہوئے فرار ہو گئے۔سندھ اورپنجاب کے سرحدی علاقے کچہ کشمور سے ڈاکٹر خالد کو بحفاظت بازیاب کرالیا ۔ ترجمان پنجاب پولیس نے بتایا کہ خفیہ اطلاعات پر مغوی ڈاکٹر خالد محمود کی بحفاظت بازیابی یقینی بنائی۔