فیصل آباد + اوکاڑہ (نمائندہ خصوصی + نامہ نگار) مبینہ پولیس مقابلہ میں دو ڈاکو ہلاک ہو گئے۔ تفصیلات کے مطابق تھانہ بٹالہ کالونی کے علاقہ اوڈین سٹریٹ میں ڈولفن فورس کے اہلکاروں نے دو مشکوک موٹر سائیکل سواروں کو رکنے کا اشارہ کیا۔ تو موٹر سائیکل سواروں نے پولیس پر فائرنگ کر دی۔ ڈولفن فورس کی جوابی فائرنگ سے دونوں  ہلاک ہو گئے۔ مارے جانے والے دونوں ڈاکو سگے بھائی نکلے جو ڈکیتی راہزنی کے مقدمات کے ریکارڈ یافتہ تھے۔ ایک کی شناخت عبدالریحان کے نام سے ہوئی۔ دریں اثناء اوکاڑہ کے علاقہ ستگھرہ میں 3 ڈاکو  ایک شہری سے اعوان کوٹ کے قریب  سے موٹر سائیکل اور نقدی چھین کر فرار ہو رہے تھے‘ پولیس نے تعاقب کیا تو چک نمبر 16 ون آر سٹاپ کے نزدیک ڈاکوؤں نے فائرنگ کر دی۔ پولیس نے  بھی جوابی فائرنگ کی تاہم ایک خطرناک ڈاکو اپنے ہی ساتھیوں کی فائرنگ سے ہلاک ہو گیا جس کی شناخت نہیں ہو سکی۔