لاہور(سپورٹس رپورٹر)پاکستان کے نوح دستگیر بٹ نے کامن ویلتھ پاور لفٹنگ چیمپئن شپ میںمجموعی طور پر 7 گولڈسمیت 8 تمغے جیت لئے۔ نوح دستگیر بٹ نے کلاسک کے بعد ایکویپڈ کلاس میں بھی چار گولڈ میڈلز جیت لئے۔جنوبی افریقہ کے سن سٹی میں ہونے والی چیمپئنز شپ کے ایکویپڈ کلاس میں نوح بٹ نے 120 پلس ویٹ کیٹیگری میں شاندار آغاز کیا۔ سکواٹ کے مقابلے 340 کلوگرام وزن اٹھا کر گولڈ میڈل اپنے نام کیا۔ بینچ پریس میں 210 کلوگرام وزن اٹھا کر ایک اور طلائی تمغہ جیتا۔ ڈیڈ لفٹ میں 300 کلوگرام وزن اٹھا کر ایک اور گولڈ میڈل حاصل کیا۔ مجموعی طور پر نوح بٹ نے 850 کلوگرام وزن اٹھا کر کامن ویلتھ چیمپئن شپ کا ایکویپڈ ٹائٹل بھی اپنے نام کیا۔ اس سے قبل نوح بٹ نے کلاسک کلاس میں بھی 3 گولڈ اور 1 برونز میڈل جیتا تھا۔