\فیروز والہ :ڈکیتی کی متعدد وارداتیں‘پولیس اہلکار کو یرغمال بناکر گھرمیں ڈاکہ 

فیروزوالہ( نامہ نگار ) ڈکیتی، راہزنی اور چوری کی متعدد وارداتیں‘ مزاحمت پر ڈاکوؤں نے گولی مار کر نوجوان کو زخمی کر دیا۔کوٹ عبدالمالک کے قریب ڈاکو موٹرسائیکل سوار نوجوان منیراور اس کے ساتھی سے نقدی اور دو موبائل چھین کرفرار ہو گئے۔ غازی مینارہ کے قریب مزاحمت کرنے پر دو ڈاکوؤں نے فائرنگ کر کے نوجوان گل جنید کو شدید زخمی کر دیا ۔جی ٹی روڈ پرنٹون کے قریب ڈاکو قیصر اور ساتھی سے ایک لاکھ 10 ہزار روپے اور دو موبائل چھین کر لے گئے ۔ گاؤں گندو وال میں تین ڈاکوئوں نے پولیس اہلکار محمد عظیم کو یرغمال بنا کر اس کے گھر سے لاکھوں روپے مالیت کے زیورات کرنسی نوٹ اور دیگر قیمتی اشیاء لوٹ لیں اور فرار ہو گئے۔ پولیس اہلکار محمد عظیم لاہور میں ڈیوٹی کرتا ہے جہاں سے وہ گزشتہ رات اپنے گاؤں گندو وال موٹر سائیکل پر جا رہا تھا جسے گاؤں سے باہر تین ڈاکوؤں نے روکا اور اسے یرغمال بنا کر اس کے گھر لے گئے اور اس کی مدد سے گھر کا دروازہ کھلوایا اور اسلحہ کے زور پر تمام گھر والوں کو ایک کمرے میں بند کر دیا اور گھر کی تلاشی لی۔ نارنگ منڈی پولیس نے مقدمہ درج کر لیا ہے۔ جی ٹی روڈ پر راوی ریان کے نزدیک دو ڈاکو محنت کش انصار انصاری سے ایک لاکھ 36 ہزار روپے چھین کر فرار ہو گئے۔ رچنا ٹاؤن میں دو ڈاکو شاہد علی سے نقدی اور موٹر سائیکل چھین کر فرار ہو گئے۔