نصرت فتح علی خان کی بیوہ ناہید نصرت کینیڈا میں انتقال کرگئیں، جسدخاکی بدھ کو پاکستان پہنچے گا

لاہور (کلچرل رپورٹر) معروف گلوکار نصرت فتح علی خان کی بیوہ ناہید نصرت کینیڈا میں انتقال کر گئیں۔ وہ کچھ عرصہ سے جگر کے عارضہ میں مبتلا تھیں۔ ناہید نصرت فتح خان کے انتقال کے بعد کینیڈا شفٹ ہوگئی تھیں اور آج کل اپنی بیٹی ندا نصرت اور داماد حامد کے ساتھ رہائش پذیر تھیں۔ ناہید نصرت کا جسدخاکی بدھ کو پاکستان پہنچے گا اور انہیں فیصل آباد میں نصرت فتح علی خان کے پہلو میں سپردخاک کیا جائیگا۔ شوبز کے حلقوں نے ناہید نصرت کے انتقال پر گہرے رنج و غم کا اظہار کیا ہے۔ گلوکارہ حمیرا ارشد، گلوکارہ حمیرا چنا، گلوکارہ شاہدہ منی، شبنم مجید نے کہا کہ ناہید نصرت بہت اچھی اور ملنسار خاتون تھیں۔ انتقال پر بے حد افسوس ہوا ہے۔