وزیراعظم آج ڈیرہ بگٹی میں کھچی کینال کا افتتاح کریں گے

اسلام آباد (نمائندہ خصوصی) وزیراعظم شاہد خاقان عباسی آج بلوچستان جائیں گے اور کچھی کینال کا افتتاح کریں گے۔ وزیراعظم ڈیرہ بگٹی میں منعقدہ تقریب میں کینال کا افتتاح کریں گے۔ وزیراعظم شاہد خاقان عباسی اتوار 17 ستمبر کو امریکہ کے دورے پر روانہ ہوں گے۔ وزیراعظم نیویارک میں جنرل اسمبلی کے اجلاس میں خطاب کریں گے جو 22 ستمبر کو متوقع ہے جبکہ مختلف ممالک کے سربراہان مملکت اور حکومت سے ملاقاتیں کریں گے۔ وزیراعظم صدر ٹرمپ کی طرف سے دی جانے والی ضیافت میں بھی مدعو ہیں۔ وزیراعظم کی نیویارک روانگی کا روٹ طے نہیں کیا گیا ہے۔ توقع ہے ان کی روانگی لندن کے راستے ہو گی جہاں ٹیکنیکل سٹاپ اوور ہو گا۔ جہاں ان کی سابق وزیراعظم میاں نواز شریف سے ملاقات بھی ہو سکتی ہے۔ جبکہ وہ بیگم کلثوم نواز کی عیادت بھی کریں گے۔