ویتنام: 10 منزلہ رہائشی عمارت میں آتشزدگی، 54 سے زائد افراد زندہ جل گئے

ہنوئی (نوائے وقت رپورٹ + آئی این پی) ویتنام کے ایک رہائشی اپارٹمنٹ میں لگنے والی آگ میں بچوں سمیت 54 سے زائد افرد بری طرح جھلس کر ہلاک ہو گئے جبکہ متعدد شدید زخمی ہیں۔ آگ پر قابو پا گیا گیا، کولنگ کا عمل جاری ہے۔ عالمی خبررساں ادارے کے مطابق ویتنام کی کثیر المنزلہ رہائشی عمارت کی پہلی منزل پر واقع پارکنگ میں خوفناک آگ بھڑک اُٹھی جہاں درجنوں موٹر سائیکلیں جل کر خاکستر ہو گئیں۔ پارکنگ ایریا میں لگنے والی آگ نے دیکھتے ہی دیکھتے دوسری اور تیسری منزل کو بھی اپنی لپیٹ میں لے لیا۔ امدادی کاموں کے دوران خوفناک آگ میں پھنسے 70 افراد کو بحفاظت نکال لیا گیا۔ ہسپتال انتظامیہ کا کہنا ہے کہ ہلاکتیں بری طرح جھلس جانے اور دم گھٹنے کے باعث ہوئیں۔ 20 زخمیوں میں سے 9 کی حالت نازک ہونے کے سبب ہلاکتوں میں اضافے کا خدشہ ہے۔ گنجان آباد علاقے میں واقع اس فلیٹ کی بالکونیاں چھوٹی اور لوہے کی گرل سے بند تھیں۔ آگ میں پھنسے افراد کے باہر نکلنے کا کوئی راستہ نہیں تھا اور امدادی کاموں میں بھی جگہ کی تنگی رکاوٹ تھی۔