شیخوپورہ(نمائندہ نوائے وقت)ڈسٹرکٹ سپورٹس ڈیپارٹمنٹ اور ڈسٹرکٹ ہاکی ایسوسی ایشن کے زیر اہتمام ہاکی ایجوکیشنل اینڈ گرومنگ سمر کیمپ پروگرام ہاکی سٹیڈیم میں شرو ع ہوگیا ہے‘سرپرستی ڈپٹی کمشنر سید طارق محمود بخاری ‘ ڈی ایس او اور ڈی ایچ اے کے افسران و عہدیداران کریں گے ۔ کھلاڑیوں کی ٹریننگ ہاکی اولمپئن اور قومی ٹیم کے سابق کوچ نوید عالم دیں گے ۔ پروگرام میں کوچز ، امپائرنگ و دیگر آفیشلز ٹریننگز کا بھی اہتمام کیا گیا ہے۔ کیمپ میں 8سے 18سال کے لڑکوں سمیت دیگر ہاکی کلبوں کے ہونہار کھلاڑیوں کو ٹریننگ دی جائیگی۔ پنجاب ہاکی اکیڈمی کے چیئرمین نوید عالم خصوصی لیکچرز دیں گے ، افتتاحی تقریب میں اولمپین نوید عالم ،اسسٹنٹ کمشنر فضائل مدثر، ڈی ایس او وقار عظیم، سیکرٹری ڈی ایچ اے مبشر چوہدری،تحصیل سپورٹس آفیسر نوید شاکر اور دیگر افسران و کھلاڑیوں نے شرکت کی۔ نوید عالم نے کہا کہ پنجاب میں اپنی نوعیت کا یہ پہلا ہاکی ایجوکیشنل و سمر کیمپ ہے جس کے بعد پنجاب کے دیگر اضلاع میں ایسے کیمپس منعقد کئے جائیں گے‘ پروگرام کا بنیادی مقصد ہاکی کے کھلاڑیوں کی جدید تقاضوں سے ہم آہنگ تربیت کرنے کیساتھ ہاکی ایجوکیشن اور گرومنگ کو بہتر بنانا ہے۔ پنجاب حکومت کو چاہئے کہ وہ اضلاع کی سطح پر ایسے پروگرامز اور سمر کیمپس کے فروغ کیلئے اقدامات اٹھائے۔