لاہور(سپورٹس رپورٹر) جشن آزادی کے سلسلہ میں سپورٹس بورڈ پنجاب کے زیر اہتمام منعقد ہونے والا بیڈمنٹن مقابلہ سپو ر ٹس بو ر ڈ گر ین نے جیت لیا۔ اقبال پارک سپورٹس کمپلیکس میں منعقدہ مقابلے میں سپورٹس بورڈ گرین کی ٹیم نے سپو ر ٹس بو ر ڈ وائٹ کو 4-1 سے مات دی۔ بیڈمنٹن کے مقابلوں میں شہرکے بہترین کھلاڑیوں نے اپنی صلاحیتوں کے جوہر دکھائے۔ ڈبلز لیگ بنیاد پر کھیلے گئے میچز میں کھلاڑیوں نے عمدہ کھیل پیش کیا، مقابلے دیکھنے کیلئے جونیئر کھلاڑیوں کے ساتھ ساتھ سپورٹس بورڈ کے ملازمین کی بڑی تعداد بھی موجود تھی۔ جشن آزادی کی مناسبت سے ٹیموں کے نام علامہ اقبالؒ، قائداعظم محمد علی جناحؒ، لیاقت علی خان اور چوہدری رحمت علی سے منسوب کئے گئے۔ ایونٹ میں شریک کھلاڑیوں کا کہنا تھا کہ وہ سال بھر مقابلوں میں حصہ لیتے ہیں لیکن جشن آزادی کے سلسلے میں ہونیوالے ایونٹ میں شرکت کا جذبہ ناقابل بیان ہے۔ ایونٹ کے اختتام پر مہمان خصوصی ڈائریکٹر سپورٹس جلیل چوہان نے کامیاب کھلاڑیوں میں انعامات تقسیم کئے۔