سعودی فورسز نے نجران پر داغا گیا حوثیوں کا ایک اوربیلسٹک میزائل تباہ کر دیا

ریاض (صباح نیوز)سعودی عرب کی فضائی دفاعی فورسز نے جنوبی شہر نجران کی جانب یمن سے داغے گئے ایک بیلسٹک میزائل کو تباہ کر دیا ۔ غیرملکی خبررساں ادارے کے مطابق سعودی عرب کی فضائی دفاعی فورسز نے اپنے پیٹریاٹ دفاعی نظام کے ذریعے اس میزائل کو فضا ہی میں تباہ کردیا۔ عسکری ذرائع نے اس امر کی تصدیق کی ہے کہ حوثی ملیشیا نے جان بوجھ کر ایک گنجان آباد شہری علاقے کی جانب میزائل فائر کیا تھا لیکن دفاعی افواج نے اس کو کسی ہدف پر گرنے سے قبل ہی تباہ کردیا ہے اور اس سے کوئی جانی نقصان نہیں ہوا ۔ایران کے حمایت یافتہ حوثی شیعہ باغیوں نے حالیہ ہفتوں کے دوران میں سعودی عرب پر میزائل حملے تیز کر رکھے ہیں۔حوثی باغی یمن کی قانونی حکومت کے خلاف بغاوت برپا کرنے کے بعد سے سعودی عرب کے جنوب میں واقع سرحدی شہر نجران کی جانب لا تعداد راکٹ اور میزائل فائرکر چکے ہیں ۔