کراچی (سپورٹس رپورٹر) پینٹینگولر کپ ون ڈے کرکٹ ٹورنامنٹ کے دوسرے میچ میں بلوچستان بیرز نے سندھ ڈولفنز کو سنسنی خیز مقابلے کے بعد ایک وکٹ سے شکست دیدی۔ نیشنل سٹیڈیم کراچی میں کھیلے جانیوالے میچ میں سندھ ڈولفنز نے پہلے کھیلتے ہوئے مقررہ پچاس اوورز میں 6 وکٹوں کے نقصان پر 312 رنز بنائے‘ کپتان شاہد آفریدی نے جارحانہ اور روایتی انداز میں بیٹنگ کرتے ہوئے 54 گیندوں پر 114 رنز سکور کئے۔ ان کی اننگز میں 10 چوکے اور 7 چھکے شامل تھے۔ خرم منظور نے 83 اور نعمان اللہ نے 54 رنز بنائے۔ دانش کنیریا نے 6 کھلاڑیوں کو آئوٹ کیا۔ جواب میں بلوچستان نے اچھا آغاز نہ ملنے کے باوجود بھی بہترین فائٹ بیک کی اور آخری گیند پر ہدف حاصل کرلیا۔ سعید انور جونیئر نے 97 جبکہ کامران حسین نے برق رفتار 45 رنز سکور کئے۔ سندھ کیلئے تنویر احمد نے 2‘ شاہد آفریدی اور انور علی نے 1,1وکٹ لی۔