اداروں میں بدعنوانی اوراقربا پروری کا بازار گرم ، بہتری کی امید نظر نہیں آتی: چیف جسٹس ؛ جمہوریت کو درپیش کسی بھی چیلنج سے نمٹا جائیگا، جسٹس ثاقب نثار

چیف جسٹس انور ظہیر جمالی نے کہا ہے کہ آنے والے وقت میں بہتری کی امید نظرنہیں آتی کیونکہ اداروں میں بدعنوانی اوراقربا پروری کا بازار گرم ہے،قانون کی حکمرانی کے لیے اداروں میں ہم آہنگی اورمضبوطی ضروری ہے، اسلام انسانیت کا علمبردار، محبت اورامن کا مذہب ہے، بدقسمتی سے مختلف وجوہات کی بناپر دنیا میں بدنام کیا گیا،ہمیں اپنی توانائیاں ملک کی بہتری کے لیے صرف کرنی چاہئیں۔بطور چیف جسٹس ہر شخص کی جانب سے تعاون پر ان کا شکرگزارہوں، اللہ اس آئینی ادارے کو دوام اوراستحکام بخشے۔سپریم کورٹ میں چیف جسٹس انور ظہیر جمالی کے اعزاز میں فل کورٹ ریفرنس کا انعقاد ہوا ، جس میں عدالت عظمیٰ کے تمام فاضل جج صاحبان اور اٹارنی جنرل کے علاوہ پاکستان بار کونسل اور سپریم کورٹ بار ایسوسی ایشن کے صدور نے شرکت کی۔ریفرنس سے خطاب کرتے ہوئے چیف جسٹس انورظہیرجمالی کا کہنا تھا کہ اسلام انسانیت کا علمبردار، محبت اورامن کا مذہب ہے۔ بدقسمتی سے اسلام کو مختلف وجوہات کی بناپر پوری دنیا میں بدنام کیا گیا۔ قانون کی حکمرانی کے لیے اداروں میں ہم آہنگی اورمضبوطی ضروری ہے۔ ملک میں ہرطرف افراتفری، بدانتظامی اورناانصافی کا دوردورہ ہے۔ آنے والے وقت میں بہتری کی امید نظر نہیں آتی کیونکہ اداروں میں بدعنوانی اوراقرباپروری کا بازار گرم ہے۔چیف جسٹس جمالی کا کہنا تھا میں نے ناانصافی، اقرباپروری اور بدعنوانی کے تدارک میں کردارادا کرنے کی کوشش کی۔ اب وقت بتائے گا میں اپنی کوششوں میں کتنا کامیاب ہوا۔ بدانتظامی اورافراتفری سے عوام کو ناقابل تلافی نقصان کا سامنا ہے۔ بے حسی اور ناامیدی کا احساس تباہی کا سبب بن سکتا ہے۔ ہمیں اپنی توانائیاں ملک کی بہتری کے لیے صرف کرنی چاہئیں۔ حقوق کی بات کرنے والے اپنی ذمہ داریوں سے غافل ہیں جب کہ اکثر سرکاری ادارے اپنے فرائض کی ادائیگی میں ناکام نظر آتے ہیں۔ بطور چیف جسٹس ہر شخص کی جانب سے تعاون پر ان کا شکرگزارہوں۔ اللہ اس آئینی ادارے کو دوام اوراستحکام بخشے۔انہوں نے کہا کہ اس موقع پر والدین کا ذکر نہ کرنا میری کم عقلی اور احسان فراموشی ہو گی۔ ان کی دعاؤں کی طفیل ہے کہ اللہ نے مجھے ملک کی خدمت کیلئے اہم عہدے پر فائز کیا۔ مجھ سے کئی غلطیاں سرزد ہوئی ہونگی لیکن میرا ضمیر مطمئن ہے۔ میں نے یہ فیصلہ اللہ کو حاضر ناظر جان کر نیک نیتی سے کیا۔ دوسری جانب چیف جسٹس انور ظہیر جمالی کی ریٹائرمنٹ کے بعد نامزد چیف جسٹس، جسٹس ثاقب نثار نے کہا چیف جسٹس انور ظہیر جمالی صوفی گھرانے سے تعلق رکھتے ہیں۔ چیف جسٹس کے والد حضرت بابافرید گنج شکر کے مرید تھے۔ چیف جسٹس انورظہیرجمالی کی خدمات بے مثال ہیں۔ ان کا منصب امتحانوں اور آزمائشوں سے بھرا پڑا ہے۔ عدلیہ شہریوں کے بنیادی حقوق کے تحفظ کی ذمہ دارہے۔ آزاد عدلیہ جمہوریت کا اہم جزو ہے۔ عدلیہ کو غیر جانبدار اور دباؤ سے آزاد ہوکرکام کرنا چاہیے۔ اللہ کے فضل سے پاکستان کی عدلیہ آزاد ہے اورعدلیہ آئندہ بھی اپنی آزادی کو برقراررکھے گی۔ ان کا کہنا تھا بددیانتی، بے ایمانی سے ہی بدعنوانی پروان چڑھتی ہے جب کہ حکومت اورانتظامیہ کی اختیارات کے استعمال میں کوتا ہی کرپشن ہے۔جسٹس ثاقب نثار نے کہا کہ جمہوریت کو درپیش کسی بھی چیلنج سے نمٹا جائیگا۔