لاہور(سپورٹس رپورٹر)آئی سی سی ٹیسٹ رینکنگ میں قومی ٹیم کے کپتان بابر اعظم اور وکٹ کیپر بیٹر محمد رضوان کی تنزلی ہو گئی۔ نئی رینکنگ کے مطابق آسٹریلیا کے مارنوس لابوشین کی پہلی پوزیشن برقرار جبکہ سٹیون سمتھ دو درجے ترقی کےساتھ دوسرے نمبر پر آ گئے ہیں۔پاکستان ٹیم کے کپتان بابر اعظم ایک درجے تنزلی کےساتھ تیسرے نمبر پر آ گئے جبکہ انگلینڈ کے جو روٹ ایک درجے تنزلی کے بعد چوتھے نمبر پر پہنچ گئے ہیں۔عبداللہ شفیق کی بھی تین درجے تنزلی ہوئی اور وہ 15 ویں سے 18 ویں نمبر پر آ گئے ہیں، محمد رضوان کی 4 درجے تنزلی کے بعد 21 ویں نمبر پر چلے گئے ہیں۔ سعود شکیل 32 درجے ترقی کے بعد 61 نمبر پر آ گئے ہیں۔باﺅلرز کی رینکنگ میں آسٹریلیا کے پیٹ کمنز کا پہلا نمبر برقرار جبکہ انگلینڈ کے جیمز اینڈرسن ایک درجے ترقی کےساتھ دوسرے نمبر پر آگئے ہیں۔بھارت کے ایشون ایک درجے تنزلی کےساتھ تیسرے نمبر پر آگئے جبکہ انگلینڈ کے اولی رابنسن تین درجے ترقی کے بعد چھٹے نمبر پہنچ گئے ہیں۔ شاہین آفریدی کا پانچواں نمبر برقرار جبکہ پاکستان کے ابرار احمد کا پہلا ٹیسٹ کھیلنے کے بعد رینکنگ میں 60 واں نمبر ہے۔