اسلام آباد(خبرنگار) اسلام آباد بورڈ آف ایجوکیشن کے زیر اہتمام جماعت پنجم کا امتحان آج 15دسمبر سے شروع ہو گا۔ تمام طلبہ کو رولنمبر سلپس اور امتحانی سنٹرز الاٹ کر دیے گئے ہیں ان خیالات کا اظہار چیئرمین اسلام آباد بورڈ آف ایجوکیشن چوہدری محمد ارشد نے امتحانی عملے کے تربیتی پروگرام سے خطاب کرتے ہوئے کیا انہوں نے کہا کہ پرائیویٹ سکولز نیٹ ورک اسلام آباد نے اپنی مدد آپ کے تحت اس بورڈ کا قیام 1999عمل لایا تھا جو 24سال سے کم آمدنی والے نجی تعلیمی اداروں کے طلبہ کی بورڈ فائنل امتحانات سے قبل اسی پیٹرن پر پری بورڈ امتحانات کی ریہرسل کا انعقاد کرتاہے ۔ کنٹرولر امتحانات مقبول حسین ڈار نے کہا کہ بھارہ کہو، ترنول ، ہمک، سہالہ، روات، جھنگی سیداں ، ہائی وے اور راول زونز میں اس سال بھی سینکڑوں بچوں کے وفاقی نظامتِ تعلیمات کے جاری کردہ پیٹرن پر پری بورڈ امتحانات کا انعقاد کیا جارہاہے جس کو تعلیمی ماہرین ،سول سوسائٹی ، ریگولیٹری اتھارٹی اور وزارتِ تعلیم کے اعلیٰ عہدیداران بھی وزٹ کریں گے۔