کراچی (کرائم رپورٹر)کراچی میں جمعرات کو تشدد اور فائرنگ کے واقعات میں7 افراد ہلاک اور 7 افراد زخمی ہوگئے۔ مغل ہزارہ گوٹھ میں فائرنگ کے نتیجے میں دو نوجوان 20 سالہ شارق اور 22سالہ ریحان ہلاک ہوئے۔ پولیس کا کہنا ہے مقتول شارق کا اپنے ماموں عمیر کے ساتھ کمیٹی کے پیسوں کا تنازعہ تھا جس کی وجہ سے عمیر نے اس پر فائرنگ کی اور شارق کے ساتھ اس کا دوست ریحان بھی گولیاں لگنے سے جاںبحق ہوگیا۔ کراﺅن سینما کے نزدیک سے ایک شخص کی لاش ملی جسے تشدد کے بعد سر اور چہرے پر گولیاں مار کر ہلاک کیا گیا تھا۔ مقتول کی شناخت نہیں ہو سکی۔ دریں اثناء سہراب گوٹھ نیو کراچی میں بھیم پورہ اور سپر ہائی وے پر فائرنگ سے 7 افراد زخمی ہو گئے۔ سائٹ میں سیمنز چورنگی پر کار پر فائرنگ سے 2افراد مارے گئے‘ مقتول شیر شاہ کباڑی مارکیٹ کے عہدیدار تھے۔ مزید برآں سائٹ کے علاقے میں سیمنز چورنگی پر موٹر سائیکل سوار مسلح افراد نے ایک کار پر اندھا دھند گولیاں برسائیں جس کے نتیجے میں کار میں سوار دو افراد 65 سالہ مرزا افتخار بیگ اور 60 سالہ شکیل احمد ہلاک ہوگئے۔ واقعے کے بعد شیر شاہ کباڑی مارکیٹ بند کردی گئی۔