قصور اورشیخوپورہ میں پولیس مقابلوں میں 5ڈاکو ہلاک جبکہ پولیس کانسٹیبل شہید اور 3 اہلکار زخمی ہو گئے۔تفصیلات کے مطابق قصور کے نواحی گائوں ورن میں ڈاکوئوں اور پولیس کے درمیان فائرنگ کے تبادلے میں 2 ڈاکوہلاک اور پولیس کانسٹیبل شہید جبکہ 3 اہلکار زخمی ہو گئے۔پولیس کے مطابق ڈاکوئوں کے ساتھ مقابلے میں زخمی ہونے والے پولیس اہلکاروں میں کانسٹیبل، اے ایس آئی اور سب انسپکٹر شامل ہیں۔پولیس کی جانب سے زخمیوں کو اسپتال منتقل کر دیا گیا ہے، جبکہ ہلاک ہونے والے دونوں ڈاکووں کی شناخت کا عمل جاری ہے۔ادھر شیخوپورہ میں جنڈیالہ روڈ پر چٹی کوٹھی کے قریب مبینہ پولیس مقابلے میں 3ڈاکو ہلاک جبکہ 2فرار ہوگئے۔پولیس کے مطابق 5ڈاکو چٹی کوٹھی کے قریب ناکہ لگا کر شہریوں سے لوٹ مار کر رہے تھے کہ اطلاع ملنے پر ڈولفن اہلکار وہاں پہنچ گئے جنہیں دیکھ کر ڈاکوئوں نے فائرنگ کردی، پولیس اہلکاروں کی جوابی فائرنگ میں 3ڈاکو مارے گئے جبکہ ان کے 2ساتھی فرار ہونے میں کامیاب ہوگئے۔پولیس نے ہلاک ڈاکووں کی لاشیں پوسٹ مارٹم کے لیے ڈی ایچ کیو اسپتال منتقل کردیں۔ فرار ہونے والے ڈاکوئوں کی تلاش جاری ہے۔