پاکستان سپر لیگ 9 پرسوں سے شروع، کراچی کنگز ملتان پہنچ گئے

لاہور(سپورٹس رپورٹر)پاکستان سپر لیگ 9 کا آغاز ہفتہ پرسوں 17 فروری سے ہو گا۔ کراچی کنگز کے شیر اپنا رنگ جمانے کیلئے ملتان پہنچ گئے۔ افتتاحی میچ دفاعی چیمپئن لاہور قلندرز اور اسلام آباد یونائیٹڈ کے درمیان قذافی سٹیڈیم میں کھیلا جائیگا۔کراچی کے شیر 18 فروری کو  پہلے مقابلے میں ملتان سلطانز سے ٹکرائیں گے۔پاکستان سپر لیگ کی ٹیم کوئٹہ گلیڈی ایٹرز کے نائب کپتان سعود شکیل نے کہا کہ کپتان کو ہٹانے یا بنانے کا فیصلہ فرنچائز مالکان کا ہوتا ہے۔ پی ایس ایل کیلئے تیار ہیں، کئی روز سے تیاری کر رہے ہیں، اچھا پرفارم کرنے کیلئے منتظر ہیں۔ موقع ملنے سے فائدہ اٹھانے کی کوشش کروں گا، سرفراز احمد سینئر ہیں اور ٹیم میں کردار پہلے جیسا ہی رہے گا۔ کپتان رائیلی روسو دنیا بھر کی لیگز کھیلتے ہیں، انہیں اندازہ ہے کہ ٹیم کو کیسے ساتھ لے کر چلنا ہے، کپتان کو اندازہ ہے کہ اچھا کمبی نیشن کیسے بنایا جائے۔ محمد عامر ورلڈ کلاس بائولر، آنے سے فائدہ ہوگا۔ نائب کپتانی کا کوئی دباؤ نہیں ، جب بھی کپتانی کا موقع ملا تو انجوائے کیا۔ دورہ آسٹریلیا سے اعتماد میں کوئی کمی نہیں آئی، کیریئر میں اتار چڑھاؤ آتا رہتا ہے۔ امید کرتا ہوں پی ایس ایل کے میچز میں اچھا پرفارم کروں گا۔ ہماری دو سیزن کی کارکردگی ڈسکس ہوتی ہے مگر ابھی بھی ہماری جیت کی شرح سب سے زیادہ ہے، پی ایس ایل کے رواں سیزن پر فوکس ہے۔