مری غیر قانونی تعمیرات کیس،بلڈوزر کرائے پر لیں اور غیر قانونی تعمیرات گرائیں:جسٹس ثاقب نثار

اسلام آباد: چیف جسٹس آف پاکستان جسٹس ثاقب نثار نے مری میں غیر قانونی تعمیرات سے متعلق کیس کی سماعت کرتے ہوئے ڈپٹی کمشنر مری کو حکم دیا ہے کہ بلڈوزر کرائے پر لیں اور غیر قانونی تعمیرات گرائیں۔پیر کوسپریم کورٹ میں چیف جسٹس پاکستان جسٹس ثاقب نثار کی سربراہی میں 3 رکنی بینچ نے غیر قانونی تعمیرات سے متعلق کیس کی سماعت کی۔ چیف جسٹس نے ڈپٹی کمشنر مری سے مکالمے کے دوران ریمارکس دیئے کہ میں نے مال روڈ جوانی میں بھی دیکھا ہے اور بڑھاپے میں بھی، غیر قانونی تعمیرات کس کی ہیں. جن کے دور میں یہ تعمیرات ہوئی ان کے ناموں کی فہرست بھی فراہم کریں. مری جائیں منادی کروادیں جسے آنا ہے عدالت آجائے. عدالتوں میں جو کیس ہیں ان کی تفصیلات بھی فراہم کریں۔انہوں نے کہا سیاسی اثرورسوخ کی وجہ سے غیرقانونی تعمیرات ہم سے چھپائی نہ جائے. یہ کوئی راکٹ سائنس نہیں ہے. یہ غیرقانونی تعمیرات آپ کے ادارے کی آشیرباد سے ہوئیں. ثابت کریں کہ ملک میں قانون کی حکمرانی ہے۔ بلڈوزر کرائے پر لیں اور تعمیرات گرائیں. یہ عمارتیں گریں گی یا آپ گر جائیں گے. بعد ازاں عدالت نے کیس کی مزید سماعت منگل تک ملتوی کردی گئی۔