اترپردیش میں کمبھ میلہ آج شروع ہوگا، لاکھوں ہندو زائرین کی آمد

نئی دہلی(این این آئی)بھارتی ریاست اتر پردیش میں کمبھ میلے کے سلسلے میں لاکھوں ہندو عقیدت مندوں کی آمد کا سلسلہ جاری ہے۔غیرملکی خبررساں ادارے کے مطابق صدیوں پہلے شروع ہونے والے اس ہندو مذہبی میلے میں اس مرتبہ بارہ ملین سے زائد افراد کی شرکت متوقع ہے۔ اسے دنیا کا سب سے بڑا مذہبی اجتماع بھی قرار دیا جاتا ہے۔ اس میلے کا باقاعدہ آغاز منگل کے روز ہو گا۔ اتر پردیش ریاست میں الہ آباد کے قریب یہ میلہ ایک ایسے مقام پر منعقد ہوتا ہے، جہاں گنگا، جمنا اور سرسوتی نامی دریا ملتے ہیں۔ ہندو عقیدے کے پیروکار اس مقام کو انتہائی مقدس سمجھتے ہیں۔