کیپ ٹائون  بھارت کا جنوبی افریقہ میں سریز جیتنے کا خواب چکنا چور

کیپ ٹائون(آئی این پی)جنوبی افریقہ نے کیگن پیٹرسن کی دونوں اننگز میں نصف سنچریوں کی بدولت بھارت کو تیسرے ٹیسٹ میچ میں 7وکٹوں سے شکست دے کر سیریز2-1سے اپنے نام کر لی۔جنوبی افریقہ نے 212رنز کا ہدف 3وکٹوں کے نقصان پر پورا لیا ۔جنوبی افریقہ کی جانب سے  پیٹرسن نے 82، ڈوسن  41اور باووما  32رنز  بنا کر نمایاں بلے باز رہے۔پیٹرسن کو عمدہ بیٹنگ پر میچ کے ساتھ ساتھ سیریز کا بھی بہترین کھلاڑی قرار دیا گیا۔کیپ ٹائون میں کھیلے گئے سیریز کے تیسرے اور آخری ٹیسٹ میچ میں بھارت نے ٹاس جیت کر پہلے بیٹنگ کا فیصلہ کیا۔کپتان ویرات کوہلی نے 79رنز کی شاندار اننگز کھیلی لیکن ایک مرتبہ پھر ان کا 71ویں انٹرنیشنل سنچری بنانے کا خواب پورا نہ ہو سکا جبکہ چتیشور پجارا نے 43رنز بنائے۔بھارت کی ٹیم  پہلی اننگز میں223رنز بنا کر پویلین لوٹ گئی، جنوبی افریقہ کی جانب سے کگیسو ربادا نے 4اور مارکو جینسن نے تین وکٹیں حاصل کیں۔جنوبی افریقہ کے بلے باز جسپریت بمراہ کی عمدہ بالنگ کے سبب خاطر خواہ کارکردگی دکھانے میں ناکام رہے۔پیٹرسن 72رنز کے ساتھ سب سے کامیاب بلے باز رہے جبکہ ٹیمبا باووما نے 28 اور کیشپ مہاراج نے 25رنز کی اننگز کھیلی۔جنوبی افریقہ کی پوری ٹیم پہلی اننگز میں 210رنز بنا کر آئوٹ ہو گئی اور بھارت نے پہلی اننگز میں 13 رنز کی برتری حاصل کی، بمراہ نے پانچ وکٹیں لیں ۔بھارت کی دوسری اننگز کا آغاز انتہائی مایوس کن رہا اور 58رنز پر چار بلے باز پویلین لوٹ چکے تھے تاہم کوہلی اور ریشابھ پنت کی 94 رنز کی شراکت نے مہمان ٹیم کی لاج رکھ لی۔بھارتی ٹیم دوسری اننگز میں 198رنز پر ڈھیر ہو گئی اور جنوبی افریقہ کو میچ میں فتح کے لیے 212رنز کا ہدف دیا۔مارکو جینسن نے 4اور کگیسو ربادا نے تین وکٹیں حاصل کیں۔ہدف کے تعاقب میں ایڈن مرکرم صرف 16رنز پر چلتے بنے لیکن اس کے بعد کپتان ڈین ایلگر اور کیگن پیٹرسن کی جوڑی بھارتی بالرز کے خلاف ڈٹ گئی۔دونوں نے ٹیم کی سنچری مکمل کرانے کے ساتھ ساتھ 78رنز کی ساجھے داری بھی قائم کی، اس شراکت کا خاتمہ اس وقت ہوا جب ایلگر 30 رنز بنانے کے بعد بمراہ کی وکٹ بن گئے۔دوسرے اینڈ سے پیٹرسن نے عمدہ بیٹنگ کا سلسلہ جاری رکھا اور راسی وین ڈر ڈوسن کے ہمراہ 54 رنز جوڑے، انہوں نے دوسری اننگز میں بھی نصف سنچری اسکور کی اور 82رنز کی اننگز تراشنے کے بعد شردل ٹھاکر کی گیند پر وکٹیں محفوظ نہ رکھ سکے۔اس کے بعد ڈوسن اور ٹیمبا باووما نے ذمے دارانہ بیٹنگ کرتے ہوئے مزید کوئی وکٹ نہ گرنے دی اور جنوبی افریقہ نے 3 وکٹوں کے نقصان پر ہدف حاصل کر لیا، ڈوسن نے 41اور باووما نے 32رنز بنائے۔پیٹرسن کو عمدہ بیٹنگ پر میچ کے ساتھ ساتھ سیریز کا بھی بہترین کھلاڑی قرار دیا گیا۔
خواب چکنا چور