لاپتہ بھارتی خاتون کرکٹر کی نعش جنگل سے برآمد 

لاہور (سپورٹس ڈیسک) بھارت کی ریاست اوڑیسا سے تعلق رکھنے والی خاتون کرکٹر راج شری کی نعش جنگل سے برآمد کر لی گئی۔ خاتون کرکٹر 11جنوری سے لاپتہ تھی جبکہ اس کی سکوٹی بھی پولیس کو جنگل کے قریب سے مل گئی۔ ڈپٹی کمشنر پولیس کا کہنا ہے کہ واقعہ کا مقدمہ درج کر لیا گیا۔ بھارتی میڈیا کے مطابق نیشنل لیول ٹورنامنٹ کیلئے ٹریننگ کیمپ لگایا گیا تھا،  16 رکنی ٹیم میں راج شری جگہ حاصل کرنے میں ناکام رہی تھی۔ مرنے والی خاتون کرکٹر کے اہلخانہ نے واقعے کو قتل قرار دیتے ہوئے کہا ہے کہ نعش پر زخموں کے نشانات تھے۔ اہلخانہ کے مطابق راج شری فاسٹ بائولر اور مڈل آرڈر بیٹر تھی۔