شکارپور (نامہ نگار) ٹریفک حادثے کے نتیجے میں خاتون سمیت تین افراد موقع پر ہی ہلاک جبکہ دس سے زائد شدید زخمی ہوگئے۔ تفصیلات کے مطابق خانپور میں قومی شاہراہ پر داروغہ نہر کے قریب تیز رفتار کار، موٹرسائیکل اور مسافر ویگن میں زوردار ٹکر ہوگئی۔ تصادم کے نتیجے میں آمنہ بی بی، ثناء اللہ اور شاہنواز موقع پر چل بسے جبکہ محمد موسیٰ، میر حسن، محبوب جھنگوانی، جام جھنگوانی، عرفان احمد سمیت دس سے زائد افراد زخمی ہونے کی اطلاعات ہیں۔ واقعے کی اطلاع ملتے ہی پولیس نے جائے وقوعہ پر پہنچ کر لاشوں سمیت زخمیوں کو اپنی تحویل میں لیکر خانپور اسپتال پہنچایا۔ حادثے کی اطلاع پر خانپور اسپتال میں ایمرجنسی  نافذ کردی گئی. اسپتال سے لاشوں کا پوسٹ مارٹم کرانے کے بعد انہیں ورثاء  کے حوالے کیا گیا. جبکہ شدید زخمیوں کو تشویشناک حالت میں سول اسپتال شکارپو اور سکھر اسپتال منتقل کیا گیا۔