شہبازشریف کی کوئی اسکیم کامیاب نہیں ہورہی، وہ دیکھ رہے ہیں شاید کوئی غیب سے مدد آجائے: چودھری پرویز الہٰی

ایک تقریب سے خطاب کرتے ہوئے وزیراعلیٰ پنجاب چودھری پرویز الہٰی کا کہنا تھا کہ شہبازشریف کی کوئی اسکیم کامیاب نہیں ہورہی، شہبازشریف دیکھ رہے ہیں شاید کوئی غیب سے مدد آجائے، پی ڈی ایم میں اب ایسی پھوٹ پڑ جائے گی کہ یہ اٹھنے کے قابل نہیں ہوں گے، یہ انتخابات میں منہ چھپاتے پھریں گے۔چودھری پرویز الہیٰ نے کہا کہ نوازشریف اس لئے نہیں آرہے کیونکہ ان کو ناکامی نظر آرہی ہے، ایک جھوٹے کو نوازشریف نےاس کی کلاس لینے کے لئے بلالیا ہے، عمران خان نے کل ٹھیک کہا ہے کہ شہبازشریف کا تو میں بندوبست کروں گا، اسحاق ڈار کہتے تھے میں ڈالر لے آؤں گا یہ ناکام ہو گئے۔انہوں نے کہا کہ عمران خان قوم کی امید ہے آخر کسی نے تو قوم کے لیے اٹھنا تھا، پی ٹی آئی کی سوچ اچھی اور لیڈر ایماندار ہے عمران خان ملک کے لیے خدمت کا جذبہ رکھتے ہیں ، تمام نوجوان اور اسٹوڈنٹس عمران خان کے لئے کام کررہے ہیں۔چودھری پرویز الہٰی کا مزید کہنا تھا کہ ہزار لوگوں نے حکومت ختم ہونے کی مخالفت کی، ہم نے عمران خان سے کیا ہوا وعدہ پورا کیا، کوئی سودے بازی نہیں ہوئی کہیں کوئی سودے بازی کا ذکر نہیں ہوا، صرف یہ سوچا کہ عمران خان ایماندار ہے،لیڈ کرنے کا اہل ہے، ہم نے 4ماہ میں 4سال جتنا کام کیا ہے، ہم نے ہر سیکٹر میں کام کیا ہے، ہر موقعے پر پنجاب حکومت نظر آئی ہے۔