سینئرصحافی واینکر ارشد شریف قتل کیس کی تحقیقات کے سلسلے میں اسپیشل جے آئی ٹی دبئی پہنچ گئی۔
ذرائع کے مطابق سینئر اینکر پرسن شہید صحافی ارشد شریف قتل کیس کے سلسلے میں اسپیشل جے آئی ٹی کی پانچ رکنی ٹیم دبئی پہنچ گئی ہے۔اسپیشل جے آئی ٹی کی ٹیم تین سے چار روز تک دبئی میں قیام کرے گی اور کیس کے حوالے سے تمام معلومات حاصل کریں گی، اس کے علاوہ اسپیشل جے آئی ٹی دبئی سے کینیا بھی جائے گی۔
گزشتہ روز نجی نیوز کے سینئر اینکرپرسن شہید صحافی ارشد شریف قتل کیس کے سلسلے میں اسپیشل جے آئی ٹی کل رات دبئی روانہ ہوئی تھی جہاں سے ایک ہفتے انکوائری کے بعد جے آئی ٹی کینیا جائے گی۔اس حوالے سے ذرائع نے بتایا تھا کہ دبئی میں ٹیم ارشد شریف کے آخری دنوں کی ملاقاتوں اور رابطوں کی معلومات لے گی اور کینیا میں جے آئی ٹی جائے وقوعہ کے ساتھ وقار اور اس کے بھائی سے بھی ہوچھ گچھ کرے گی۔ذرائع کا کہنا تھا کہ جے آئی ٹی کیلئے سفری اخراجات اور ٹی اے ڈی کی مد میں ایک کروڑ روپے اسلام آباد پولیس نے ادا کیے۔ وزارت داخلہ اور وزارت خزانہ نے جے آئی ٹی کے اخراجات ادا کرنے سے معذرت کرلی تھی۔ پولیس نے ہیڈکوارٹر کی گاڑیوں کی مینٹیننس اوراسٹیشنری کے سالانہ بجٹ سے رقم ادا کی۔
