اورکزئی ایجنسی کے بالائی علاقوں میں سکیورٹی فورسز کی پیش قدمی جاری ہے ، جیٹ طیاروں نے غنڈاکی ، مشتی کنڈی، چھپری ،علی خیل اور مامازئی میں عسکریت پسندوں کے ٹھکانوں پر بمباری کی جس کے نتیجے میں پندرہ ہلاک اورچھ زخمی ہوگئے ۔ اس کارروائی میں شدت پسندوں کے تین ٹھکانے بھی تباہ ہوئے ۔ ادھر مہمند ایجنسی کی تحصیل پڈانگ غار کے علاقے لویہ شاہ میں آج صبح ایف سی ، خاصہ دارفورس اورپولیس نے مشترکہ سرچ آپریشن شروع کیا ۔ قانون نافذ کرنیوالے اداروں نے تحصیل امبارسے تعلق رکھنے والے بیس مشتبہ افراد کو حراست میں لے لیا ہے ۔ ادھر تحصیل بائیزئی سے ملنے والی اطلاعات کے مطابق کڈا خیل میں بارودی سرنگ کا دھماکا ہوا ہے جس میں امن کمیٹی کا ایک رضا کارزخمی ہوا ہے ۔ دوسری جانب چارسدہ کے علاقے شبقدرمیں سروکلی کے مقام پرپولیس وین کے قریب دھماکہ ہوا جس سے دو اہلکار زخمی ہوگئے ۔ ادھرہنگو کی تحصیل ٹھل میں بھی ایک اہم شدت پسند کو گرفتارکرلیا گیا جس کے قبضے بارود بھی برآمد ہوا ہے ۔