آسٹریلیا میں نائٹ ٹیسٹ کے انعقاد کی کوششوں میں تیزی آگئی

سڈنی(این این آئی) آسٹریلیا میں نائٹ ٹیسٹ کے انعقاد کی کوششوں میں تیزی آگئی، نشریاتی ادارے نے3سال کے اندر فلڈ لائٹس میں میچزکے آغاز کی منصوبہ بندی شروع کردی۔ غیر ملکی میڈیا کے مطابق انٹرنیشنل کرکٹ کونسل کافی عرصے سے نائٹ ٹیسٹ کرکٹ کے انعقاد کےلئے کوششیں کررہی ہے اس مقصد کیلئے موزوں گیند کی تلاش جاری اور مختلف ممالک کے فرسٹ کلاس میچز میں آزمائش بھی ہوچکی ہے مگر ابھی تک کوئی بڑی پیشرفت سامنے نہیں آئی، اب اس خواب کو حقیقت میں بدلنے کا بیڑا آسٹریلیا کے نشریاتی ادارے چینل نائن نے اٹھالیا اس نے 3 برس میں فلڈ لائٹس میں سفید لباس کے ساتھ روایتی پانچ روزہ کرکٹ کی منصوبہ بندی شروع کردی،اس سلسلے میں کرکٹ آسٹریلیا سے آزمائشی بنیادوں پر ایک ٹیسٹ کے انعقاد کی درخواست بھی کی گئی ہے۔
کرکٹ آسٹریلیا کے آفیشل براڈ کاسٹرکے ایگزیکٹیو پروڈیوسر بریڈ میک نیمارا نے بتایا کہ ہم نے اس سلسلے میں بورڈ سے بات چیت شروع کردی، ون ڈے اور ٹوئنٹی 20 کے برعکس ٹیسٹ کرکٹ کے ساتھ ایک بڑا مسئلہ میچز کے دن میں ہونا ہے، اس وقت لوگوں کی اکثریت اپنے دفاتر، یا پھر اسکول کالجز میں ہوتی ہے، اس لیے ناظرین کی تعداد بہت کم رہتی ہے، اگر نائٹ ٹیسٹ کا خواب حقیقت بنے تو اس سے نہ صرف ہم براڈ کاسٹرز بلکہ خود کرکٹ کو بھی فائدہ ہوگا۔ایک بار نائٹ ٹیسٹ شروع ہونے کی دیر ہے پھر یہ دنیا بھر میں کھیلا جانے لگے گا