لندن (عارف چودھری) لندن میں گزشتہ روز 3 گھٹنوں کے دوران مختلف علاقوں میں موٹرسائیکل سوار نامعلوم افراد نے تیزاب کا سپرے کرکے 5 افراد کو لوٹ لیا۔ 2 افراد بری طرح جھلس گئے، ایک کا موٹرسائیکل چھین لیا گیا، پولیس نے ایک نوعمر لڑکے کو حراست میں لے لیا۔ دریں اثنا سکاٹ لینڈ یارڈ نے مشرقی لندن میں شہریوں کے چہروں پر تیزاب پھینکنے والے چار حملہ آوروں کے بارے میں تحقیقات شروع کر دی ہیں۔ میٹرو پولیٹن پولیس کے حکام نے بتایا کہ حملہ آور موٹر سائیکل پر سوار تھے۔ حملے کا نشانہ بننے والے افراد کو ہسپتال منتقل کیا گیا۔ ایک شخص شدید زخمی ہوا ہے۔ تاہم ابھی تک کوئی گرفتاری عمل میں نہیں آئی۔ تفصیل کے مطابق موٹر سائیکل پر سوار ایک 32 سالہ شخص کو ایک دوسرے موٹر سائیکل پر سوار دو حملہ آوروں نے نشانہ بنایا جس سے ان کا چہرہ زخمی ہو گیا۔ پولیس کا کہنا ہے کہ دونوں افراد نے متاثرہ شخص کے چہرے پر تیزاب کا سپرے کیا اور اسے پرے دھکیل کر اس کی موٹر سائیکل بھی چھین لی۔ زخمی شخص کی زندگی کے لیے کوئی خطرات نہیں۔ پولیس کو سٹوک نٹوینگٹن میں کیزنیو روڈ پر ڈکیتی کی اطلاع ملی اور انہیں معلوم ہوا کہ اس واقعہ میں بھی تیزابی مادے کا استعمال ہوا ہے۔ بتایا گیا کہ جس شخص کے چہرے پر یہ مادہ ڈالا گیا اس سے ان کا چہرہ بہت متاثر ہوا۔