ایڈیلیڈ اوول کے ہیڈ کیوریٹرڈیمیئن ہوف آج لاہور پہنچیں گے 

لاہور(سپورٹس رپورٹر)ایڈیلیڈ اوول کے ہیڈ کیوریٹرڈیمیئن ہوف آج 15 جولائی جمعہ کو لاہور پہنچیں گے،وہ 28 جولائی تک پاکستان میں قیام کریں گے۔ اس دوران وہ کراچی، ملتان اور راولپنڈی بھی جائیں گے۔ معروف ڈیمیئن ہوف اس فیلڈ میں 26 سال کا تجربہ رکھتے ہیں۔ وہ پاکستان کے ان چاروں شہروں میں موجود ٹیسٹ سینٹرز کی آؤٹ فیلڈ اور پچ سکوائرز کا معائنہ کریں گے۔اس دوران وہ مقامی کیوریٹرز، کرکٹ ایسوسی ایشنز اور سٹی کرکٹ ایسوسی ایشنز کو تینوں طرز کی کرکٹ کیلئے پچز کی تیاری پر خصوصی لیکچرز دیں گے۔وہ ان کیوریٹرز اور کوچز کو ڈے اینڈ نائٹ ٹیسٹ میچز کیلئے پچز کی تیاری پر بھی معلومات فراہم کریں گے۔