ورلڈ گیمز‘ احسن رمضان کی پہلے میچ میں کامیابی،کوارٹرفائنل میں پہنچ گئے

لاہور(سپورٹس رپورٹر)امریکہ میں جاری ورلڈ گیمز میں شریک واحد پاکستانی کیویسٹ 16 سالہ احسن رمضان نے اپنے پہلے میچ میں امریکی قومی چیمپئن احمد علی السید کو شکست دیکر کوارٹر فائنل کیلئے کوالیفائی کر لیا،احسن رمضان نے امریکی حریف کو 1–3 سے شکست دی،کوارٹر فائنل مقابلے آج جمعہ کو کھیلے جائیں گئے۔ ورلڈ گیمز امریکی ریاست البامہ کے شہر برمنگھم میں 7 جولائی سے جاری ہیں جس میں 108 ممالک کے3600 اتھلیٹ شریک ہیں،ورلڈ گیمز کے سنوکر مقابلوں میں پاکستان کے 16 سالہ عالمی چیمپئن احسن رمضان نے پہلے میچ میں امریکہ کے قومی  چیمپئن احمد علی السید کو 1-3 سے شکست دی، 5 فریمز پر مشتمل میچ میں پہلافریم جیتنے کے بعد احسن رمضان دوسرے فریم میں ناکام رہے۔احسان رمضان نے پہلے فریم میں 31-73 سے کامیابی حاصل کی جبکہ دوسرے فریم میں احسن رمضان کو 58-49 سے ناکامی کا سامنا کرنا پڑا،عالمی چیمپئن نے اگلے دونوں فریمز میں سبقت دکھاکر کوارٹر فائنل میں رسائی حاصل کرلی۔احسن رمضان نے تیسرے فریم میں 34-100(66)،چوتھے فریم میں 53-74سے کامیابی سمیٹی، احمد رمضان نے اپنے امریکی حریف کو 1–3 سے شکست دی۔10ہزار پاؤنڈز سٹرلنگ کے مساوی انعامی رقم کی چیمپئن شپ ورلڈ کنفیڈریشن آف پلیئرزسپورٹس کے تحت کھیلی جارہی ہے۔