واشنگٹن میں سفارتخانے کی پرانی عمارت فروخت کرنے کا عمل مکمل

اسلا م آبا د (خصوصی نامہ نگار)وفاقی حکومت کی ہدایات کی روشنی میں پاکستانی سفارت خانہ واشنگٹن ڈی سی نے آر اسٹریٹ واشنگٹن ڈی سی  میں واقع سفارت خانے کی پرانی عمارت کو فروخت کرنے کا عمل مکمل کر لیا گیا ہے۔تفصیلا ت کے مطا بق اس حوالے سے لنکن لائبریری، والڈورف آسٹوریا ہوٹل واشنگٹن میں ایک تقریب کا انعقاد کیاگیا جس میں کانگریس کی خاتون رکن جیسمین کروکٹ، کانگریس کے رکن گریگوری میکس اور سابق رکن ایڈی برنیس جانسن نے شرکت کی۔اس موقع پر گفتگو کرتے ہوئے امریکہ میں پاکستان کے سفیر مسعود خان نے اس بات پر اطمینان کا اظہار کیا کہ کابینہ کے فیصلے کے مطابق جائیداد کی فروخت اور منتقلی کی گئی ہے۔ انہوں نے یہ بھی واضح کیا کہ کوئی اور جائیداد فروخت نہیں کی جارہی۔یہ پراپرٹی ایک پاکستانی نڑاد امریکی عبدالحفیظ خان نے خریدی ہے جس نے 7.1 ملین ڈالر کی سب سے زیادہ بولی کی پیشکش کی تھی اور اسے وفاقی کابینہ کی جانب سے منظور کر لیا گیا تھا۔کانگریس کی سابق خاتون رکن ایڈی برنیس نے اس موقع پر اظہار خیال کرتے ہوئے عبدالحفیظ خان کو تاریخی عمارت خریدنے پر مبارکباد دی۔ انہوں نے حفیظ خان کی کامیابیوں پر روشنی ڈالی اور ان کی مستقبل کی کامیابیوں کے حوالے سے نیک خواہشات کا اظہار کیا۔عبدالحفیظ حفیظ خان نے اپنے ریمارکس میں وزیر اعظم پاکستان اور وفاقی کابینہ کا شکریہ ادا کیا کہ انہوں نے ان کی پیشکش کو قبول کیا۔ انہوں نے کہا کہ پاکستانی امریکن شہری ہونے کے ناطے ان کے لیے ایک ایسی عمارت کا مالک ہونا فخر کی بات ہے جس نے کئی دہائیاں پاکستانی کمیونٹی کی خدمت کی۔ وفاقی کابینہ نے30 نومبر 2022 کو ہونے والے اپنے اجلاس میں اس حقیقت کو مدنظر رکھتے ہوئے کہ یہ عمارت گذشتہ دو دہائیوں سے زیر استعمال نہیں تھی اور امریکی حکام کی جانب سے اس کی سفارتی حیثیت کو واپس لئے جانے کے بعد ٹیکسز کی مد میں کثیر اخراجات آ رہے تھے اور بلڈنگ کی دیکھ بھال اور اس پر اٹھنے والے دیگر اخراجات ،جو کہ ٹیکس دہندگان کو اٹھانے تھے، کو مدنظر رکھتے ہوئے اس عمارت کو فروخت کرنے کا فیصلہ کیا گیا۔