فوجی محافظ نے ملک سے فرار ہونے کی کوشش کرنے والے فوجی کو گولی مار دی: یوکرین

یوکرین نے پیر کو کہا کہ غیر قانونی طور پر ملک سے فرار ہونے کی مبینہ کوشش کرنے والے ایک فوجی کو سرحدی محافظ نے پکڑ کر حراست میں لے لیا اور اس کے بعد گولی مار کر ہلاک کر دیا۔کئیف نے فوجی بھرتی کی ایک جارحانہ مہم شروع کی ہے جس سے ایسی اطلاعات کو تقویت ملی ہے کہ یوکرین کے مرد فوجی خدمات سے بچنے کے لیے سرحد پار ہمسایہ ممالک میں داخل ہو رہے ہیں۔اسٹیٹ بیورو آف انویسٹی گیشن (ایس بی آئی) نے کہا کہ بحیرۂ اسود کے ساحل پر جنوبی یوکرین کے علاقے اوڈیسا میں چار فوجیوں کو مالڈووان کی سرحد کی طرف پیدل جاتے ہوئے پکڑا گیا۔ایس بی آئی نے کہا، "سرحدی محافظوں نے انہیں سرحد پار کرنے کی کوشش کرتے ہوئے دیکھا اور حراست میں لے لیا۔" ایس بی آئی نے مزید کہا کہ یہ واقعہ ایک دن پہلے پیش آیا تھا۔ادارے نے مزید کہا، "مفروروں میں سے ایک نے فرار ہونے کی کوشش کرتے ہوئے سرحدی محافظ پر حملہ کر دیا۔ اس کے جواب میں محافظ نے اپنا سروس ہتھیار استعمال کیا اور حملہ آور کو گولی مار دی۔" بتایا گیا ہے کہ واقعے کی تحقیقات بھی شروع کر دی گئی ہیں۔سرحدی محافظوں کے ترجمان آندری ڈیمچینکو نے یوکرین کے میڈیا کو بتایا کہ گارڈ نے اپنے دفاع میں آتشیں اسلحہ استعمال کیا۔سرحدی محافظوں نے کہا ہے کہ ملک کی مغربی سرحد سے گذرنے والے دریائے تیسا کو عبور کرنے کی کوشش میں صرف اس سال ایک درجن سے زیادہ افراد ہلاک ہو چکے ہیں۔انہوں نے حالیہ مہینوں میں غیر قانونی طور پر سرحد عبور کرنے کی کوشش کرنے والے درجنوں افراد کو بھی حراست میں لیا ہے۔