پی سی بی کے چیف سلیکٹر محسن حسن خان نےقومی کرکٹ ٹیم کے سابق کپتان یونس خان کی دورہ انگلینڈ میں شمولیت کا عندیہ دے دیا ہے۔

غیرملکی ویب سائٹ کو انٹرویو دیتے ہوئے محسن حسن خان کا کہنا تھا کہ پی سی بی نے یونس خان کو کلئیرنس دینے پر رضامندی کا اظہار کردیا ہے اور اب سلیکشن کمیٹی کوان کی ٹیم میں شمولیت کےحوالے سے حتمی فیصلہ کرنا ہے۔ محسن خان کا کہنا تھا کہ یونس خان انگلینڈ میں کاؤنٹی کرکٹ کھیلنے میں مصروف ہے جو ان کے لئے اچھی بات ہے، محسن حسن نے کہنا ہے کہ وہ یونس خان کی اب تک کی کاؤنٹی کارکردگی سے مطمئن ہیں۔
قومی کرکٹ ٹیم پانچ جولائی سے آسٹریلیا کے خلاف پہلا ٹوئنٹی ٹوئنٹی میچ کھیل کر اپنے دورے کا آغاز کرے گی۔ پاکستان دورے میں آسٹریلیا کے خلاف دو ٹوئنٹی ٹوئنٹی میچوں کی سیریز کے علاوہ دو ٹیسٹ میچ بھی کھیلے گی۔ اسکے بعد قومی کرکٹ ٹیم انگلینڈ کے خلاف چار ٹیسٹ میچوں کی سیریز سمیت دو ٹوئنٹی ٹوئنٹی اور پانچ ایک روزہ میچوں کی سیریز کھیلے گی۔