گوجرانوالہ + سیالکوٹ (نمائندہ خصوصی + نامہ نگار) دوستوں کیساتھ شرط لگا کر نہر میں کودنے اور نہر میں نہاتے ہوئے 2 نوجوان ڈوب گئے۔ تفصیل کے مطابق گوجرانوالہ کے علاقے فیروزوالہ روڈ کا 27 سالہ شکیل فیکٹری میں محنت مزدوری کرتا تھا اور اپنے دوستوں کے ہمراہ نہر اپر چناب میں نہانے کیلئے آیا شکیل نے پانی سے گزر کر نہر کے دوسرے کنارے تک جانے کیلئے اپنے دوستوں سے دو ہزار روپے کی شرط لگائی اور وہ پل سے نہر میں کود گیا کچھ دیر تک اوپر نہ آنے پر اس کے دوستوں نے بھی چھلانگیں لگا دیں مگر اس کا کوئی سراغ نہ ملا تاہم واقعہ کی اطلاع پر ریسکیو کے غوطہ خور بھی موقع پر پہنچ گئے اور تلاش شروع کر دی۔ سیالکوٹ کی تحصیل ظفر وال کے گائوں سیال کا رہائشی بیس سالہ ارسلان ارشد سیالکوٹ کے علاقہ میں اپنے دوستوں کے ساتھ آیا ہوا تھا جہاں وہ نہر میں نہاتے ہوئے تیز پانی کی موجوں میں بہہ گیا اور ڈوب کر ہلاک ہو گیا۔ ریسکیو ٹیم کے عملہ نے جدوجہد کرکے اس کی نعش نہر سے نکال کر ورثاء کے حوالے کر دی۔