کراچی: رکشے پر فائرنگ، ماں، بیٹی، نواسہ جاں بحق، 3گینگسٹر مقابلے میں ہلاک

کراچی (نوائے وقت رپورٹ) کراچی کے علاقے سرجانی ٹائون میں موٹر سائیکل رکشے پر فائرنگ سے ماں بیٹی اور نواسہ جاں بحق ہو گئے۔ پولیس کے مطابق جاں بحق ہونے والوں میں ماں بیٹی اور ایک 12سالہ لڑکا شاہد شامل ہے۔ واقعہ ذاتی دشمنی کا شاخسانہ لگتا ہے۔ مزید تفتیش جاری ہے۔ دریں اثناء لیاری کلاکوٹ میں پولیس مقابلے میں گینگ وار کے تین کارندے ہلاک ہو گئے۔ ایس ایس پی سٹی فدا حسین کے مطابق ہلاک ملزموں کا تعلق لیاری گینگ وار کے عزیر بلوچ گروپ سے تھا۔ ملزمان صوبائی وزیر جاوید ناگواری کے گھر پر حملے میں ملوث تھے جس میں جاوید ناگواری کے بھائی جاں بحق ہوئے۔ ملزم ٹارگٹ کلنگ، بھتہ خوری، اغوا برائے تاوان کی سنگین وارداتوں میں ملوث تھے۔ اسلحہ اور دستی بم برآمد کر لئے گئے۔ پولیس کے مطابق کھارادر سے سٹے کے کاروبار میں ملوث 23ملزم گرفتار کر لئے۔