پی پی سندھ کارڈ کھیل کر نفرت پیدا کرنے کیلئے کوشاں ہے: فردوس شمیم

کراچی (نوائے وقت رپورٹ) تحریک انصاف کے رہنما اور سندھ اسمبلی میں قائد حزب اختلاف فردوس شمیم نقوی کا کہنا ہے کہ پیپلز پارٹی سندھ کارڈ کھیل کر نفرت پیدا کرنے کی کوشش کر رہی ہے۔ کراچی میں میڈیا سے گفتگو کرتے ہوئے فردوس شمیم نقوی کا کہنا تھا کہ تفرقہ بازی کرنا سندھ حکومت کی عادت بن چکی ہے اور سندھ حکومت وفاق کے خلاف نفرت پیدا کرنے کی کوشش کر رہی ہے۔ سندھ حکومت ایسا تاثر دیتی ہے کہ انہیں حقوق نہیں مل رہے۔ آئی جی سندھ پولیس کا نہیں بلکہ پیپلزپارٹی کا آئی جی بنا ہوا ہے، سندھ حکومت جب بھی بات کرتی ہے جھوٹ کہتی ہے اور سندھ حکومت کے وزراء کہتے ہیں کہ انہیں جائز حق نہیں ملا۔