شمالی چھاونی: ڈور سے موٹرسائیکل سوار جاں بحق‘ انسپکٹر معطل سبزہ زار میں بھی گردن کٹ گئی

لاہور (نمائندہ خصوصی) شہر میں قاتل ڈور پھرنے سے ایک شخص جاں بحق جبکہ ایک زخمی ہو گیا۔ تفصیلات کے مطابق شمالی چھائونی کے علاقہ عسکری ٹین کے قریب ڈور پھرنے سے موٹرسائیکل سوار شہری سید شبیر حسین زخمی ہو گیا اور پولیس کے مطابق شبیر حسین ہسپتال میں دم توڑ گیا۔ سی سی پی او لاہو ر نے واقعہ کا نوٹس لیتے ہوئے ایس پی کینٹ سے رپورٹ طلب کر تے ہوئے تھانہ شمالی چھائونی کے سب انسپکٹر اکرام اللہ کو معطل کر دیا۔ دوسری جانب سبزہ زار کے علاقہ میں بھی شاہ فرید دربار کے قریب کٹی پتنگ کی ڈور پھرنے سے نوجوان شہ رگ کٹ جانے کے باعث زخمی ہو گیا۔ زخمی کو طبی امداد کے لئے ہسپتال منتقل کر دیا گیا۔