لاہور(اسپورٹس رپورٹر)چیئرمین پاکستان کرکٹ بورڈ رمیز راجہ نے کہا ہے کہ پاکستان انگلینڈ سیریز کی میزبانی کیلئے پْرجوش ہیں، انگلینڈ ٹیم نے رواں سال دو مرتبہ پاکستان کا دورہ کرنا ہے۔برطانوی ہائی کمشنر اور چیئرمین پی سی بی رمیز راجہ کی قذافی سٹیڈیم میں ملاقات ہوئی جس میں انگلینڈ کرکٹ ٹیم کے دورہ پاکستان پر تبادلہ خیال کیا گیا۔پی سی بی چیئرمین نے بتایا کہ انگلش فینز اور کرکٹ ماہرین سنسنی خیز کرکٹ دیکھنے پاکستان آنا چاہتے ہیں۔اس موقع پر برطانوی ہائی کمشنر کرسٹن ٹرنر نے کہا کہ کرکٹ ہمارے خون میں ہے، یہ کھیل دونوں ممالک کو جوڑتا ہے۔ ہم دونوں ممالک کے درمیان 75 سالہ دوستی کا بھی جشن منا رہے ہیں۔ رمیز راجہ نے کہا ہے کہ انگلینڈ کے دورہ پاکستان کی تاریخوں کا اعلان جلد کیا جائیگا۔ملاقات کا مقصد دورہ انگلینڈ کے حوالے سے بات چیت اور حالات اور تیاریوں کا جائزہ لینا تھا۔ باقی تفصیلات سے بعد میں آگاہ کیا جائیگا۔رمیز راجہ نے کہا کہ یہ ہمارے لیے ایک اچھا چیلنج ہو گا کیونکہ انگلینڈ کی ٹیم انتہائی قابل ہے انگلش ٹیم رواں سال ستمبر‘ اکتوبر میں سات ٹی ٹونٹی کھیلنے کیلئے پاکستان کا دورہ کرے گی ۔آسٹریلیا میں شیڈول ٹی20 ورلڈکپ کے بعد انگلش ٹیم ایک بار پھر نومبر اور دسمبر کے وسط میں تین ٹیسٹ میچز کیلئے پاکستان آئے گی۔