لاہور(نامہ نگار)سبزہ زار کے علاقے میں سی آئی اے صدر اور ڈاکوئوں کے درمیان مبینہ پولیس مقابلہ میں ایک ملزم ندیم عرف بھولا ہلاک ہوگیاہے۔پولیس کا کہنا ہے کہ ملزمان کی گرفتاری کے لیے پولیس ٹیم نے علاقہ تھانہ سبزہ زار ریڈ کیا توڈاکوؤں نے گرفتاری سے بچنے کے لیے پولیس پارٹی پر اندھا دھند فائرنگ کردی جبکہ ملزمان کی اپنی فائرنگ کی زد میں آکر ان کا اپنا ساتھی ندیم عرف بھولا ہلاک ہو گیا۔ پولیس اہلکار معجزانہ طور پر محفوظ رہے۔پولیس کا کہنا ہے کہ ہلاک ہونے والا ملزم ندیم عرف بھولا سابقہ ریکارڈ یافتہ دوران ڈکیتی شہریوں کو فائر مارنے کا عادی ہے۔ملزم کئی جرائم پیشہ افراد کا کرائے کا شوٹر بھی ہے۔ملزم پولیس کو فائرنگ،قتل ڈکیتی و راہزنی کی متعدد وارداتوں میں مطلوب تھا۔ پولیس نے ہلاک ہونے والے ملزم کی لاش قبضے میں لے کر پوسٹ مارٹم کے لیے مردہ خانے منتقل کر کے قانونی کارروائی شروع کردی ہے۔