یونان: سمندرمیں تارکین وطن کی کشتی ڈوبنے سے 79 افراد ہلاک

غیر ملکی میڈیا کے مطابق یونان کے پائلوس قصبے کے قریب کھلے سمندر میں اوور لوڈ کشتی ڈوبنے کا واقعہ پیش آیا ہے ، کشتی میں 750 افراد سوارتھے اور وہ لیبیا سے اٹلی جا رہی تھی ۔ حکام کا بتانا ہے کہ کشتی میں سوار بیشتر افراد کی عمر 20 سال تھی، جبکہ جہاز میں سوار زیادہ تر افراد کا تعلق پاکستان، شام اورمصر سے تھا۔ حکام کے مطابق حادثے میں 104 مسافروں کو بچالیا گیا ہے جبکہ یونانی کوسٹ گارڈز اور نیوی کشتیاں، جہاز اور ہیلی کاپٹرز ریسکیو آپریشن میں شریک ہیں ۔ یونان کی صدر کیٹرنینا ساکیلاروپولو بھی جائے حادثہ پر پہنچ گئیں جن کو مقامی حکام نے ریسکیو آپریشن پر بریفنگ دی۔ واضح رہے کہ یونان یورپی یونین میں مشرق وسطیٰ، ایشیا اور افریقہ سے آنے والے تارکین وطن کے لیے اہم راستوں میں سے ایک ہے ، گزشتہ ماہ یونانی حکومت کو اس ویڈیو فوٹیج پر بین الاقوامی تنقید کا سامنا کرنا پڑا تھا جس میں مبینہ طور پر سمندر میں بہہ جانے والے تارکین وطن کو زبردستی بے دخل کرتے ہوئے دکھایا گیا تھا۔ اقوام متحدہ کے اعداد و شمار کے مطابق، اس سال 70,000 سے زیادہ مہاجرین اور تارکین وطن یورپ کے فرنٹ لائن ممالک میں پہنچے ہیں، جن میں سے اکثریت اٹلی میں پہنچی ہے۔