لاہور؍ فیروز والہ (نامہ نگار+ نمائندہ نوائے وقت) ٹریفک حادثات میں ماں بیٹی سمیت 4 افراد جاں بحق ہو گئے۔ تفصیلات کے مطابق شاہدرہ کے علاقے میں تیز رفتار ڈمپر دو افراد کو کچلتا ہوا نالے میں جا گرا۔ جس کے نتیجے میں طالبہ سمیت  دو افراد جاں بحق  ہو گئے جبکہ  ڈمپر ڈرائیور زخمی ہو گیا۔ طالبہ کی شناخت شزہ بی بی اور دوسرے شخص کی شفیق کے نام سے ہوئی۔ دریں اثناء حافظ آباد میں افتخار احمد ساکن نوہیانوالہ موٹر سائیکل پر اپنی بیوی شبانہ اور گیارہ سالہ بیٹی خدیجہ کے ہمراہ جا رہا تھا کہ دوآبہ کے قریب دوسری موٹر سائیکل سے ٹکرا کر نیچے گر پڑے، پیچھے سے آنے والے ڈمپر نے ان پر چڑھائی کردی جس سے تینوں شدید زخمی ہوگئے۔ انہیں ٹراما سنٹر لیجایا گیا جہاں ماں اور بیٹی زخموں کی تاب نہ لاتے ہوئے دم توڑ گئیں۔